ZÈTTEL 2023

Ganz ooni gspyyrbaare Drùgg,

mir luege ùff nyynzig Jèèrli zrùgg!

(Vòòrdraab: Alti Gaardischte als Wègglibuebe,

Waage: Daig-Affe in dr Bagg-Stùùbe)

 

Vor langer Zyt hän e baar Bèggergselle,

baardu aggtiv Fasnacht mache welle!

Dr Daig-Affe-Club isch esoo gebòòre,

und das vor iber nyynzig Jòòre!

Unseri Club-Grinder, - das macht stolz,

sin alli gsyy us guetem Holz!

 

Mir mache doo e kùùrze Verglyych,

sälbi Zyt, dr Aafang vom dritte Ryych!

Das isch gschichtlich bewyyse,

sich gòschdyymiere in dääre Gryyse,

het bruucht vor allem grosse Muet,

dòòrùm lipfe mir jètz nò dr Huet!

Scho dèèrt het me miese spaare in allne Ègge,

um uff baaseldytsch gsait, «nit z verrègge»!

 

Und hitte, - das isch zem Gryyne,

d Corona und dr Grieg in dr Ukrayyne!

Dr Putin drait dr Gaashaane zue,

wär het nit vò däm efange gnue?

Dr Pfuus wird drum dyyr und gnabb,

zem Gligg hange mir Daig-Affe nit dervò ab!

Wenn ùns s Fasnachtsfieber phaggt,

isch ùnseri Energie nò lang intaggt!

 

Doch lòsse mir das im Momänt syy,

und hoffe, das Drama goot emool verbyy!

Gniesse mir doch wider s Fasnachtsdryybe,

dr Gòòrtèèsch, wo lang vergässe isch blyybe,

d Wääge und die vyyle andere Sache,

wo die drei Dääg scheen dien mache!

 

Anno 1933 het s no kaini Traktore gää,

do het me miese mit Ross Vorlieb nää!

Au die hän sich uff d Fasnacht gfrait wie no nie,

anstatt e Gillewaage, e Sujetwaage dèrfe zie!

Fir d Wääge und d Schääse zem Gligg - ojee,

het me dèèrt no kaini Dierschitzer gsee!

 

S grosse Phublikùm isch no bschaide blyybe,

mit Wurfmaterial het me s noonig iberdryybe!

Anstatt Dääfeli, Gummibäärli und andere Sache,

hän Daig-Affe sälber Weggli bache,

yyphaggt und am Gòòrtèèsch verschänggt,

fascht wie hitte, wär hätti das doomools dänggt!

Derzue saage mir dir nur ains,

hesch kai Blagette, bikunsch e kains!

 

Die Traditioon hän mir Junge und Alte,

sòlang wie meeglig welle bhalte!

 

Nyynzig Jòòr und immer nò im Saft,

mit Daatedrang und voller Graft,

syg das bim Waagebau oder Fèschte,

mir gän halt immer nùmme s Bèschte!

S Gòschdyym wie d Larve mien basse,

sùnscht kùnt ùnseri Sujet-Kòmissioon an d Kasse!

 

Vyyles isch druurig und schyter,

doch s Lääbe goot trotzdäm wyter!

Ains muesch glyych halt wisse,

mir saage das mit guetem Gwisse,

ùnseri Fasnacht kasch nit uffwärte mit Gäld,

die isch èppis vom Bèschte uff dr Wält