Liebi Mitgliider und Fallowers
An dr GV vom letschte Fritig isch dr Vorstand wie bishäär bestätigt worde. Fir die scheene Verdienscht vo unserem langjäärige Aggtiv- und Passivmitgliid Eric Dörflinger het GV im Aadraag aistimmig zuegstimmt, in bi de Daig-Affe als Eeremitgliid uff Läbzyte z ernenne. Mir gratuliere im zue däm Dittel rächt häärzlig.
Vorussichtlig findet unsere Bummel am Samschtig, 12. Septämber 2026 statt. Bitte s Datum vorläufig reserviere! Details kemme nò !
Do no dr Noochruef resp. Riggbligg vo dr Fasnacht 26 uss dr Sicht vomene alte Gardischt:
Pherseenlige Riggbligg uff d Fasnacht 26
Scho wider hän mir e Jeerli mee,
und d Fasnacht 26 isch au passee!
Weemietig froog y hindedryy,
kaa e Fasnacht denn no besser syy?
Ooni die laidige Käller-Gschicht,
lueg y zrugg, ganz us minere Sicht!
S letschte Joor han y scho gsait,
mini aggtivi Fasnacht isch Vergangehait!
Iiberaal duet s efange wee,
und jeedes Joor kunt das wie mee!
Drum han’is kenne yyrichte,
uff dr Gortèsch daasmool ganz z verzichte!
Ains aber isch mir noonig verlaide,
d Fasnacht hälfe z vorberaite!
Y waiss doch ganz genau,
aafange duet s scho vor em Waagebau!
Nach dr Sujetsitzig muesch scho afo dängge,
wie ka me das Theema in e verständligi Richtig rängge!
Sig das jetzt im Herbscht oder im Winter,
immer steggt do gaischtigi Biez derhinder!
Boore, Schruube, Sääge isch nit so my Sach,
do hän mir Spezialischte, die sy vom Fach!
Mir duet nit me anders iibrig blyybe,
als no fuuli Sprichli und dr Zeedel d schryybe!
Im Grosse und Ganze isch d Vorberaitig guet,
doch mit Lämpe ha ych nit am Huet!
Git s Schissereie, dass waiss e jeede,
setti me aifach dryyber reede!
S Goschdym bestimme isch soone Sach,
aber sicher kai Grund fir e grosse Grach!
Iiber d Massge ka me au anderer Aasicht syy,
normaal schwätzt me au doo nit dryy!
Die Aggtive wisse, was y dermit maine,
me ka nit Billig-Bryys und Qualität veraine!
Dangg unsere Thalänt im organisiere,
het me alles no kenne korrigiere!
Was aber wiirgglig isch zem Schreie,
die Affe, wo schnäll dr Leffel dien lo keie!
Voorhäär isch vyyles scheen und rächt,
uff aimool isch alles saumässig schlächt,
mache e Muschkepfli und lauffe dervoo,
in dr Mainig Brobleem leese kasch au esoo!
Y ha vo settige und andere Gschichte gnue,
und wänd mi wider dr Fasnacht sälber zue!
Wie gsait, bi nimme aggtiv gsyy,
laider isch die Zyt verbyy!
Am Mäntig mittag mit ere glaine Lischt,
ha mi ganz haimlig unter Zueschauer gmischt!
Bi so uff dr Wettstaibrugg gstande,
in dr Hoffnig, Daig-Affe dien bald lande!
D Bebbi, sogar dr Dupf-Club mit dr alte Gaarde,
alli lauffe duure, uff Daig-Affe muesch no waarte!
Zerscht han y gmaint, vo de Vordrääbler kenni aine,
doch so mit dr Laarve kennsch halt glyych e kaine!
Hey, - do sait pletzlig mi Schatz,
Daig-Affe sin scho uff em Minschterblatz!
Denn isch alles zimlig schnäll gange,
bim Apéro sin mir denn länger blyybe hange!
S Bier und dr Wysswyy uss em Haane,
das griege numme Daig-Affe aane!
Zoobe spoot, bi Cordon-Bleu und Wyy,
isch s im Gifthüttli rächt gmietlig gsyy!
Dangge, das wird y nit vergässe,
ha mit de Aggtive no derfe ässe!
Dr Räscht vo minere Fasnacht kurz und stramm,
am Zischtig Guggekonzärt und Gässle im Brogramm,
am Mittwuch Nomidaag denn mit guetem Stiil,
am Gortèsch, dasmool aber alles in Ziviil!
Clique, Gugge, aini nach dr andere waggle duure,
mir schyynt, e baar sin scho dytsch gsait uff dr Schnuure!
Dr Gortèsch lauffe isch zwoor nit schlächt,
bi däre Wèèrmi unter dr Larve schluucht das rächt!
Au motorisierti Vehikel faare zaalryych verbyy,
schlussändlig sin doo au Daig-Affe derbyy!
Luege y das us dr Sicht vom e Wäägeler aa,
mir hän mit de Fake-New s aktuellschte Sujet kaa!
Wie scho gsait, was uns an däne Fake-News steert,
wie im Spiegel, - alles isch verkeert!
Dr Apéro denn noonemool wie gwoont,
y muess saage, s het sich wider gloont!
Vor allem die grieni Fee,
wird gsoffe jeedes Joor wie mee!
Y gib s zue, das isch nit so mi Mass,
ha lieber e kiels Bier vom Fass!
Im Aescheblatz und zwoor ganz gepfläggt,
zoobe Schnitzelbängg, das het gfäggt!
Fascht wäri denn d Fasnacht gloffe,
hätti nit no Daig-Affe troffe!
Im Schnääderänte-Käller ganz unde,
zem Aastosse zwai bis drei Runde!
Y ligg do nit ganz dernääbe,
ha e scheeni Fasnacht derfe erlääbe!
Das isch jetz au nit glooge,
das het mi derzue bewooge,
und ooni welle z iberdryybe,
als alte Gardischt no aggtiv z blyybe,
Kameradschaft wyter z pflääge,
das isch au im Alter no e Sääge!
In weelere Form au immer,
mir wärde alli nimme jünger!
D Uur laufft halt immer schnäller,
drum mi Empfäälig: «nutzet Zyt mit eme Appezäller!»
Scheene Oobe
Urs
Daig-Affe-Club Alti Gaarde
An däre Stell au e häärzligs Danggescheen an alli Funggtionäre vom Daig-Affe-Club fir iri Arbet an dr Fasnacht und s ganze Jòòr duure.
dr Daig-Affe-Club
10.5.26
Liebi Mitgliider und Fallowers
Dr Waage isch abbaut und s Material versorgt fir die näggschti Fasnacht. Provisorisch hänn mir e Blätzli gfunde, wo unser Wäägeli derf dr Summerschloof mache dermit s denn fir s Joor 2027 wider fiire ghoolt ka wärde. Mir hoffe aber immer no uff e besseri Leesig innere Halle.
An dr sogenannte Lämpesitzig wird amme besproche, was isch guet gsyy an dr letschte Fasnacht und was nit. Was kennti me no besser mache in dr Vorberaitig und so wyter? Das isch wider e Gläägehait um zämme z koo und mit eme Gleesli Wyy sich weemietig zrugg bsinne an die letschti Fasnacht. Richtigi Lämpe settis gweenlig kaini gää, numme dass das au no gsait isch.
Wenn Du no mee mèchtisch wisse muesche aabe scrolle. Under anderem findsch e Reminder in Värsform zem runde Geburtsdaag vomene alte Gaardischt.
dr Daig-Affe-Club
26.03.2026
E glaine intärne Daig-Affe Reminder
zem Geburtsdaagsfescht Urs
vom 20.3.26 im Chäller vom Rest. Aeschenplatz
Y mecht die Gläägehait nää,
epis Glains zem Beschte z gää!
Mir sinn jo doo unter uns,
drum verzapf y jetz au kai Brunz!
Die letschte 80 Joor, das isch wòòr,
kemme mir fascht wie zwai Wùche vòòr!
Dr biologisch Wegger macht tigg-tagg, tigg-tagg,
und uurpletzlig bisch e alte Sagg!
Doch y will nit luege hinde dryy,
was vergange isch, das isch verbyy!
Aigentlig haa ych gar nimme welle,
epis vo letschter Fasnacht verzelle!
Doch pletzlig, waiss gar nit wie,
ha mir dänggt, lieber jetzt als nie!
Im Vorjoor hänn mir scho gsait,
die letschti Fasnacht isch Vergangehait!
Vergässe mir unser Bäch und Phanne,
nyt me haut uns jetzt no in d Pfanne!
Mir fyyle uns wie nei geboore,
und mache Fasnacht wie vor Joore!
Doch wie das so isch,
Broblem mien uffe Disch.
Unser glains Wäägeli isch zwoor toll,
mit acht Aggtive isch s aber blùtschevoll!
Ain vo dr alte Gaarde isch au no doo,
het aber dasjoor e spirituelli Phause gnoo!
Ych sälber, s isch kai beese Wille,
dr Gortesch lauffe goot nimme ooni Bille!
Drumm haan’is kenne richte,
uff dr Gortèsch ganz z verzichte!
E andere Gaardischt, s isch laider esoo,
im het me s Daig-Affe-Aggtive-Permis gnoo!
Das isch zwoor e ganz anderi Gschicht,
doch jeedi Gschicht het e Gsicht!
Muesch aifach druff achte,
vo weelere Syte das duesch betrachte!
Vo de Statute us isch s aber gää,
dr Eereobmaa ka me im nit nää!
Zem guete Gligg, das isch jetz nit zem lache,
är het mit em Dupf-Club derfe Fasnacht mache!
E andere, das isch au kei Neie,
het kurz vor dr Fasnacht dr Leffel lo keie!
Die Art und Wyys, das kasch nit esoo mache,
oder me isch wiirklig nit ganz bache!
Sy Larvemacherkunscht in Eere,
duet mi au nit wyters steere!
Elai dr Pinoccios Zingge isch gsyy dr Waan,
het uusgsee wie e iibergrosses Gschlächtsorgaan!
Dangg unsere Thalänt im Kaschiere,
het me das uff d Fasnacht no kenne korrigiere!
In dr Tat, - am Schluss zellt numme s Resultat.!
Sunscht isch dr Waagebau sau guet gloffe,
me het sich wider regelmässig troffe!
Das mit em Goschdym, das isch ains vo de Laschte,
isch aber kai Grund zem Usraschte!
Das muess me alle Betailigte loo,
dr Waage und dr Pinoccio sinn am Änd guet uuse koo!
Au wie me das alles esoo nimmt,
s Wätter und die allgemaini Stimmig hänn au no gstimmt!
Au d Waage-Vernissage mit fascht iiber 80 Lyt,
isch wie jeedes Joor e grosse Hit!
Anstatt Räppli und Orange schiesse,
ha ych d Fasnacht dasjoor anders kenne gniesse.
Y liig hoffentlig do nit ganz dernääbe,
die Alti Gaarde setti au no lang wyter lääbe,
in weelere Form das isch au immer,
die Aggtive wärde au nimme jünger!
Trotzdäm, das muess me mir loo,
d Weemuet isch immer no doo!
Mit mine vyyle scheene Stunde,
blyyb ych mit de Daig-Affe fir immer verbunde!
Ych due staargg derfir wäärbe,
dr Daig-Affe-Club derf nit stäärbe!
Aes isch halt no epis vom Beschte,
mit Eich zämme derfe z feschte!
Dr Jubilaar
E scheeni Schèste!
Um nit in der MUBA unsere Waage fir d Fasnacht miese baue, dèrfe mir noonemoole bim Mooleratelier vom Beat Blatter unsere Waage yystelle und repariere. Vyyle Dangg Beat.
Doch ainewääg mien mir im Mèèrze 26 e Blatz ha fir unser Wäägeli kènne yystelle sùnscht isch unseri Existänz in Gfòòr. Wär èppis waiss und fir ùns no zaalbar isch bitte sich mit unserem Obmaa Thomas Lauer oder iber unseri Homepage Kontaggt in Verbindig setze.
Apropoo Blagètte Fasnacht 2026. Die ka me jeederzyt jetzt scho bstèlle bi unserem Rolf Hägler diräggt per Tf. / SMS /WhatsApp 079 798 12 65 oder iber unseri Homepage unter Menü /Kontakt. Mir dien denn dini Bstèllig entsprächend wyter laite. D Blagètte-Vernissage isch am 29. Dezämber 2025.
dr Daig-Affe-Club
Noochwee’e vom Waagebrand
Wie villicht scho alli wisse,
goot s uns immer nò verschisse!
D Pròbleem sinn fir aimool nit d Koole,
dr Brand het uns au d Halle gstoole!
Sythäär het unsere neie Waage,- dä armi Dropf,
kai bhääbigs Dach me iber em Kopf!
Das het uns Stimmig im Momänt verhaue,
mir sette wider wie friener im Freie baue!
Fir d Bauequipe wäri das zimlig myys,
me ka doch nit scheen baue im Schnee und Yys!
Jetz hänn mir doch nò e Leesig gfunde,
die isch e Lùggebiesser und zytlig bunde!
S isch zwoor nit s Gääle vom Ai,
in unserer Situation aber ainerlai!
Dr Daig-Affe-Club
In Memoriam:
Hitte hänn mir uns dèrfe verabschiide vò unserem ehemoolige Aggtivmitgliid Sue Ellen Kessler. Aes isch e scheeni Abdanggig gsyy uff em Ryy.
Vyyle Dangg dr Famyylie und alles Guete und Zueversicht !
dr Daig-Affe-Club
29.10.25