Liebi Mitgliider und Fallowers

An dr GV vom letschte Fritig isch dr Vorstand wie bishäär bestätigt worde. Fir die scheene Verdienscht vo unserem langjäärige Aggtiv- und Passivmitgliid Eric Dörflinger het GV im Aadraag aistimmig zuegstimmt, in bi de Daig-Affe als Eeremitgliid uff Läbzyte z ernenne.  Mir gratuliere im zue däm Dittel rächt häärzlig.

Vorussichtlig findet unsere Bummel am Samschtig, 12. Septämber 2026 statt. Bitte s Datum vorläufig reserviere! Details kemme nò !

Do no dr Noochruef resp. Riggbligg vo dr Fasnacht 26 uss dr Sicht vomene alte Gardischt:

Pherseenlige Riggbligg uff d Fasnacht 26

Scho wider hän mir e Jeerli mee,
und d Fasnacht 26 isch au passee!
Weemietig froog y hindedryy,
kaa e Fasnacht denn no besser syy?
Ooni die laidige Käller-Gschicht,
lueg y zrugg, ganz us minere Sicht!

S letschte Joor han y scho gsait,
mini aggtivi Fasnacht isch Vergangehait!
Iiberaal duet s efange wee,
und jeedes Joor kunt das wie mee!
Drum han’is kenne yyrichte,
uff dr Gortèsch daasmool ganz z verzichte!

Ains aber isch mir noonig verlaide,
d Fasnacht hälfe z vorberaite!
Y waiss doch ganz genau,
aafange duet s scho vor em Waagebau!
Nach dr Sujetsitzig muesch scho afo dängge,
wie ka me das Theema in e verständligi Richtig rängge!
Sig das jetzt im Herbscht oder im Winter,
immer steggt do gaischtigi Biez derhinder!

Boore, Schruube, Sääge isch nit so my Sach,
do hän mir Spezialischte, die sy vom Fach!
Mir duet nit me anders iibrig blyybe,
als no fuuli Sprichli und dr Zeedel d schryybe!

Im Grosse und Ganze isch d Vorberaitig guet,
doch mit Lämpe ha ych nit am Huet!
Git s Schissereie, dass waiss e jeede,
setti me aifach dryyber reede!
S Goschdym bestimme isch soone Sach,
aber sicher kai Grund fir e grosse Grach!
Iiber d Massge ka me au anderer Aasicht syy,
normaal schwätzt me au doo nit dryy!
Die Aggtive wisse, was y dermit maine,
me ka nit Billig-Bryys und Qualität veraine!
Dangg unsere Thalänt im organisiere,
het me alles no kenne korrigiere!

Was aber wiirgglig isch zem Schreie,
die Affe, wo schnäll dr Leffel dien lo keie!
Voorhäär isch vyyles scheen und rächt,
uff aimool isch alles saumässig schlächt,
mache e Muschkepfli und lauffe dervoo,
in dr Mainig Brobleem leese kasch au esoo!

Y ha vo settige und andere Gschichte gnue,
und wänd mi wider dr Fasnacht sälber zue!
 
Wie gsait, bi nimme aggtiv gsyy,
laider isch die Zyt verbyy!
Am Mäntig mittag mit ere glaine Lischt,
ha mi ganz haimlig unter Zueschauer gmischt!
Bi so uff dr Wettstaibrugg gstande,
in dr Hoffnig, Daig-Affe dien bald lande!
D Bebbi, sogar dr Dupf-Club mit dr alte Gaarde,
 alli lauffe duure, uff Daig-Affe muesch no waarte!
Zerscht han y gmaint, vo de Vordrääbler kenni aine,
doch so mit dr Laarve kennsch halt glyych e kaine!

Hey, - do sait pletzlig mi Schatz,
Daig-Affe sin scho uff em Minschterblatz!
Denn isch alles zimlig schnäll gange,
bim Apéro sin mir denn länger blyybe hange!
S Bier und dr Wysswyy uss em Haane,
das griege numme Daig-Affe aane!

Zoobe spoot, bi Cordon-Bleu und Wyy,
isch s im Gifthüttli rächt gmietlig gsyy!
Dangge, das wird y nit vergässe,
ha mit de Aggtive no derfe ässe!

Dr Räscht vo minere Fasnacht kurz und stramm,
am Zischtig Guggekonzärt und Gässle im Brogramm,
am Mittwuch Nomidaag denn mit guetem Stiil,
am Gortèsch, dasmool aber alles in Ziviil!
Clique, Gugge, aini nach dr andere waggle duure,
mir schyynt, e baar sin scho dytsch gsait uff dr Schnuure!
Dr Gortèsch lauffe isch zwoor nit schlächt,
bi däre Wèèrmi unter dr Larve schluucht das rächt!
Au motorisierti Vehikel faare zaalryych verbyy,
schlussändlig sin doo au Daig-Affe derbyy!
Luege y das us dr Sicht vom e Wäägeler aa,
mir hän mit de Fake-New s aktuellschte Sujet kaa!
Wie scho gsait, was uns an däne Fake-News steert,
wie im Spiegel, - alles isch verkeert!

Dr Apéro denn noonemool wie gwoont,
y muess saage, s het sich wider gloont!
Vor allem die grieni Fee,
wird gsoffe jeedes Joor wie mee!
Y gib s zue, das isch nit so mi Mass,
ha lieber e kiels Bier vom Fass!

Im Aescheblatz und zwoor ganz gepfläggt,
zoobe Schnitzelbängg, das het gfäggt!

Fascht wäri denn d Fasnacht gloffe,
hätti nit no Daig-Affe troffe!
Im Schnääderänte-Käller ganz unde,
zem Aastosse zwai bis drei Runde!

Y ligg do nit ganz dernääbe,
ha e scheeni Fasnacht derfe erlääbe!
Das isch jetz au nit glooge,
das het mi derzue bewooge,
und ooni welle z iberdryybe,
als alte Gardischt no aggtiv z blyybe,
Kameradschaft wyter z pflääge,
 das isch au im Alter no e Sääge!
In weelere Form au immer,
mir wärde alli nimme jünger!
D Uur laufft halt immer schnäller,
 drum mi Empfäälig:  «nutzet Zyt mit eme Appezäller!»

Scheene Oobe

Urs
Daig-Affe-Club Alti Gaarde

 

An däre Stell au e häärzligs Danggescheen an alli Funggtionäre vom Daig-Affe-Club  fir iri Arbet an dr Fasnacht und  s ganze Jòòr duure.

dr Daig-Affe-Club
10.5.26